గోపీచంద్‌ హీరోగా తెరకెక్కుతున్న సినిమాలు మూడు విడుదలకు సిద్ధమవుతున్నాయి. ఇందులో ఒకటి విడుదలకు నోచుకునే పరిస్థితి కన్పించడంలేదు. నయనతార హీరోయిన్‌గా నటించింది ఆ సినిమాలో. ఇంకోటి 'ఆక్సిజన్‌'. ఈ సినిమా ఇదిగో వచ్చేస్తోంది, అదిగో వచ్చేస్తోంది అన్నారేగానీ అదెప్పుడు విడుదలవుతుందో సస్పెన్సే. ఈలోగా దూసుకొచ్చేస్తున్నాడు 'గౌతమ్‌ నందా'. కమర్షియల్‌ సినిమాలకి 'రచ్చ' సినిమాతో కొత్త గ్లామర్‌ అద్దిన దర్శకుడు సంపత్‌ నంది, రవితేజతో 'బెంగాల్‌ టైగర్‌' సినిమా చేసి సూపర్‌ హిట్‌ కొట్టాడు. ఈ యువ దర్శకుడు గోపీచంద్‌తో 'గౌతమ్‌ నందా' అనే సినిమా చేస్తున్నాడు. ఈ సినిమా కోసం గోపీచంద్‌ చాలా స్టైలిష్‌గా మారిపోయాడు. గోపీ స్టైలిష్‌ లుక్‌కి అభిమానులు ఫిదా అయిపోవడం జరుగుతోంది. ఇంకో వైపున ఈ 'గౌతమ్‌ నందా' కోసం గోపీచంద్‌ 'రేర్‌ ఫీట్‌' చేశాడు. అదేమిటంటే ఆకాశంలోంచి కిందికి దూకేయడం. అదే స్కై డైవింగ్‌ ప్రక్రియ. దక్షిణాదిలోనే ఇలాంటి ఫీట్‌ ఇంతకు ముందు ఎవరూ చేయలేదని దర్శకుడు సంపత్‌ నంది అంటున్నాడు. గోపీచంద్‌ స్కై డైవింగ్‌కి సంబంధించి కొన్ని ఫొటోల్ని సోషల్‌ మీడియాలో పోస్ట్‌ చేశాడు సంపత్‌ నంది. ఈ చిత్రంలో గోపీచంద్‌ సరసన హన్సిక, కేథరీన్‌ హీరోయిన్లుగా నటిస్తున్నారు. భగవాన్‌, పుల్లారావు ఈ చిత్రానికి నిర్మాతలు కాగా, యువ సంగీత సంచలనం తమన్‌ సంగీతం అందిస్తున్నాడు