'సచిన్‌: ఎ బిలియన్‌ డ్రీమ్స్‌' పేరుతో క్రికెట్‌ దేవుడు సచిన్‌ టెండూల్కర్‌ జీవిత చరిత్ర సినిమాగా తెరకెక్కుతోంది. ఈ సినిమా ట్రైలర్‌ విడుదలయ్యింది. విడుదలైన క్షణాల్లోనే ట్రైలర్‌కి విపరీతంగా యూ ట్యూబ్‌లో హిట్స్‌ వచ్చాయి, ఇంకా వస్తూనే ఉన్నాయి. ఇరవై నాలుగు గంటలు గడవలేదుగానీ అప్పుడే 75 లక్షల వ్యూస్‌ దాటేసింది ఈ ట్రైలర్‌. ఇది క్రికెట్‌ దేవుడు సచిన్‌ టెండూల్కర్‌ మీద అభిమానులకున్న అభిమానానికి నిదర్శనంగా చెప్పుకోవాలి. సాధారణంగా ఇలాంటి బయోగ్రఫీలు బోర్‌ కొట్టించేస్తాయి. డాక్యుమెంటరీల్లా ఉంటాయి. అందుకే వీటి పట్ల ఎవరూ ఆసక్తి చూపరు. అయితే అక్కడ ఉన్నది సచిన్‌ టెండూల్కర్‌ సినిమా కాబట్టి, యూ ట్యూబ్‌ హిట్స్‌లోనూ సరికొత్త రికార్డులు సృష్టించే దిశగా పరుగులు పెడుతోంది ఈ చిత్రం. టాలీవుడ్‌ హీరో సాయిధరమ్‌ తేజ్‌, బాలీవుడ్‌ హీరో అభిషేక్‌ బచ్చన్‌, క్రికెటర్‌ విరాట్‌ కోహ్లీ వంటివారు ట్వీట్లతో ఈ సినిమా గురించి హోరెత్తిస్తున్నారు. 'క్రికెట్‌ దేవుడు మీ దగ్గర్లోని థియేటర్లకు రాబోతున్నాడు' అని అభిషేక్‌ బచ్చన్‌ చేసిన ట్వీట్‌ అయితే హైలైట్‌. 'వాట్‌ ఏ ప్లేయర్‌ వాట్‌ ఏ ట్రైలర్‌' అని రణ్‌వీర్‌సింగ్‌ చేసిన ట్వీట్‌ తక్కువేమీ కాదు. 'స్టేడియం మొత్తం సచిన్‌ పేరు మారుమోగుతున్న రోజులు నాకింకా గుర్తున్నాయి' అని సాయిధరమ్‌ తేజ్‌ ట్వీటేశాడు. ఎ.ఆర్‌.రెహమాన్‌ ఈ చిత్రానికి సంగీతం అందించగా, జేమ్స్‌ ఎర్స్‌కైన్‌ దర్శకత్వం వహించాడు. మే 26న ఈ 'సచిన్‌' ప్రేక్షకుల ముందుకు వస్తున్నాడు. 

ALSO READ: నాని చేతికి 'మెగా' సైకిల్‌