సెకండ్ వేవ్ త‌ర‌వాత‌.. సినిమాల ఉధృతి పెరిగింది. ప్ర‌తీవారం అర‌డ‌జ‌ను సినిమాలైనా బ‌య‌ట‌కు వ‌స్తున్నాయి. అందులో హిట్లెన్ని, ఫ్లాపులెన్ని, తెచ్చుకుంటున్న వ‌సూళ్లెంత అనే లెక్క‌లు ప‌క్క‌న పెడితే, కొత్త సినిమాల్ని చూసే అవ‌కాశం మాత్రం స‌గ‌టు సినీ అభిమానికి ద‌క్కుతోంది. రాబోయే రెండు వారాల్లోనూ సినిమాలు జోరుగా రాబోతున్నాయి. అందులో `శ్రీ‌దేవి సోడా సెంట‌ర్‌` ఒక‌టి. సుధీర్ బాబు క‌థానాయ‌కుడిగా న‌టించిన చిత్ర‌మిది. ప‌లాస‌న‌తో ఆక‌ట్టుకున్న క‌రుణ కుమార్ ద‌ర్శ‌కుడు.

నిర్మాణానంత‌ర కార్య‌క్ర‌మాలు పూర్త‌య్యాయి. ఈ నెల 27న ఈ చిత్రాన్ని థియేట‌ర్ల‌లో విడుద‌ల చేయాల‌ని నిర్మాత‌లు ఫిక్స‌య్యారు. ఈ సినిమా థియేట‌రిక‌ల్ రైట్స్ రూ.12 కోట్ల‌కు అమ్ముడుపోయాయి. ప్ర‌ముఖ పంపిణీదారుడు ల‌క్ష్మ‌ణ్ ఈ సినిమా రైట్స్‌ని చేజిక్కించుకున్నారు. రూ.12 కోట్లు థియేట‌రిక‌ల్ రైట్స్ రూపేణా వ‌స్తే.. మ‌రో రూ.10 కోట్ల వ‌ర‌కూ శాటిలైట్, హిందీ డ‌బ్బింగ్ రైట్స్ రూపంలో ద‌క్కించుకున్నార‌ని స‌మాచారం. ఎలా చూసినా... నిర్మాత‌ల‌కు ఇది మంచి డీలే. ప‌లాస‌తో క‌రుణ కుమార్ పేరు మార్మోగింది. అయితే ఆ సినిమా పెద్ద‌గా క‌మ‌ర్షియ‌ల్ హిట్ కాలేదు. ఈసారైనా ఈ సినిమా కాసుల వ‌ర్షం కురిపిస్తుందేమో చూడాలి.