టాలీవుడ్‌లో ఒకప్పుడు స్టార్ డైరెక్టర్‌గా గుర్తింపు తెచ్చుకున్న గుణశేఖర్ ప్రస్తుతం సరైన హిట్ కోసం ఎదురుచూస్తున్నారు. కెరీర్ ప్రారంభంలో భారీ విజయాలు సాధించిన ఆయన, అగ్ర హీరోలతో సినిమాలు తెరకెక్కించి ప్రత్యేకమైన ఇమేజ్ సంపాదించుకున్నారు. అయితే గత కొన్నేళ్లుగా వరుస పరాజయాలు ఆయన కెరీర్‌ను ప్రభావితం చేశాయి.

గుణశేఖర్ తెరకెక్కించిన వరుడు, నిప్పు, రుద్రమదేవి, శాకుంతలం వంటి భారీ బడ్జెట్ సినిమాలు ప్రేక్షకులను ఆశించిన స్థాయిలో ఆకట్టుకోలేకపోయాయి. ముఖ్యంగా ‘రుద్రమదేవి’పై భారీ అంచనాలు ఉన్నప్పటికీ, బాక్సాఫీస్ వద్ద ఆ స్థాయిలో ఫలితం రాలేదు. ఆ తర్వాత వచ్చిన ‘శాకుంతలం’ కూడా నిరాశపరిచింది. దీంతో గుణశేఖర్ కెరీర్‌పై చర్చలు మొదలయ్యాయి.

ఇలాంటి పరిస్థితుల్లో ఇప్పుడు ఆయన కొత్తగా తెరకెక్కిస్తున్న సినిమా యుఫోరియా. ఈ చిత్రం ఫిబ్రవరిలో విడుదలకు సిద్ధమవుతోంది. ఆసక్తికరమైన విషయం ఏమిటంటే… ఈ సినిమాలో స్టార్ హీరోలు ఎవరూ లేరు. ఎక్కువగా కొత్త నటీనటులతోనే ఈ మూవీని రూపొందించారు. స్టార్ క్యాస్టింగ్ లేకపోయినా, కథ–కథనాలపై పూర్తి నమ్మకంతో ఈ సినిమాను చేస్తున్నట్లు గుణశేఖర్ చెబుతున్నారు.

తాజాగా ఇచ్చిన ఇంటర్వ్యూలో గుణశేఖర్ మాట్లాడుతూ.. ప్రస్తుతం తనకు హిట్ చాలా అవసరమని, హిట్స్ లేకపోతే అవకాశాలు రావని చెప్పారు. అందుకే కంటెంట్‌పై నమ్మకంతో ‘యుఫోరియా’ను తెరకెక్కించానని, ఈ సినిమా తనకు కొత్త ఆరంభం అవుతుందని ఆశిస్తున్నట్లు తెలిపారు. ఈ సినిమాపై దాదాపు రూ.20 కోట్ల వరకు ఖర్చు చేసినట్లు సమాచారం.

స్టార్ హీరోలు లేకపోయినా, టెక్నికల్‌గా సినిమాను బాగా తీర్చిదిద్దినట్లు తెలుస్తోంది. భూమిక, సారా అర్జున్, విఘ్నేశ్ గవిరెడ్డి, గౌతమ్ వాసుదేవ్ మీనన్ ప్రధాన పాత్రల్లో నటించిన ఈ సినిమా, ముఖ్యంగా యువతను ఆకట్టుకునే కథాంశంతో రూపొందినట్లు టాక్ వినిపిస్తోంది.

‘యుఫోరియా’ హిట్ అయితే గుణశేఖర్ మళ్లీ బిజీ అయ్యే అవకాశాలు ఉన్నాయి. ఇప్పటికే ఆయన ప్రకటించిన మరో భారీ ప్రాజెక్ట్ హిరణ్య కశ్యప కూడా తిరిగి పట్టాలెక్కే ఛాన్స్ ఉందని సినీ వర్గాలు చెబుతున్నాయి. ఈ ప్రాజెక్ట్ ఎప్పుడో అనౌన్స్ అయినప్పటికీ, చాలా రోజులుగా వాయిదా పడుతూ వస్తోంది. ‘యుఫోరియా’ విజయం సాధిస్తే, ఆ సినిమా మళ్లీ మొదలయ్యే అవకాశం ఉందని సమాచారం.

మొత్తానికి, ఒకప్పుడు హిట్లతో దూసుకెళ్లిన దర్శకుడు తన కెరీర్‌ను మళ్లీ నిలబెట్టుకునేందుకు చేసిన ప్రయత్నమే ‘యుఫోరియా’. మరి ప్రేక్షకులు ఈ సినిమాను ఎలా ఆదరిస్తారు? గుణశేఖర్‌కు ఇది బ్రేక్ ఇస్తుందా? ఆయన కెరీర్‌కు కొత్త ఊపిరి పోస్తుందా? అన్నది మరికొద్ది రోజుల్లో తేలనుంది.