టాలీవుడ్ లో సంక్రాతి జోరే వేరు. మిగతా సీజన్ల కంటే సంక్రాంతికి ఎక్కువ సినిమాలు బరిలో దిగుతాయి. ఒకే సారి మూడు నాలుగు సినిమాలు వచ్చినా ఢోకా ఉండదు. కలక్షన్స్ బాగా వస్తాయి. మరీ చెత్త సినిమా అయితే తప్ప ఫ్లాప్ ఉండదు. అందుకే పోటీ పడి మరీ ధైర్యంగా సంక్రాంతి బరిలో దిగుతారు. ఈ ఏడాది కూడా సంక్రాంతికి చిరు, బాలయ్య, వెంకీ పోటీ పడతారని ఫాన్స్ హుషారుగా ఉన్నారు. విశ్వంభర సినిమాతో చిరు, NBK109 తో బాలయ్య, వెంకటేష్ అనిల్ రావి పూడి మూవీ ఈ సంక్రాంతికి కర్చీఫ్ వేసారు. కానీ అనూహ్యంగా చిరు ఈ రేసు నుంచి తప్పుకోగా చెర్రీ గేమ్ చేంజెర్ తో వస్తున్నాడు. నాగ్ వారసుడు చైతు కూడా తండేల్ తో సంక్రాంతికి సందడి చేయనున్నాడని సమాచారం.

బాలయ్య, వెంకీ మాత్రం పక్కాగా అనుకున్న టైంకే వచ్చేస్తున్నారు. వెంకటేష్, ఓటమి తెలియని దర్శకుడు అనిల్ రావిపూడి కాంబోలో 'సంక్రాంతికి వస్తున్నాం' అని టైటిల్ తోనే రాక కన్ఫర్మ్ చేసారు. F2, F3, లతో ఇప్పటికే రెండు హిట్లు సొంతం చేసుకున్న వీరిద్దరూ హ్యాట్రిక్ కోసం వెయిట్ చేస్తున్నారు. ఈ మూవీ పై భారీ అంచనాలే ఉన్నాయి. కారణం వెంక‌టేష్ కు సంక్రాంతి కలిసివస్తుందన్న నమ్మకమే. ఇప్పటికే వెంకటేష్ 'చంటి, క‌లిసుందాం రా, ల‌క్ష్మి, సీత‌మ్మ వాకిట్లో సిరిమ‌ల్లె చెట్టు, ఎఫ్ 2 ' ఇవ‌న్నీ సంక్రాంతి సూపర్ హిట్స్. చాలా రోజులుగా హిట్ కోసం ఎదురు చూస్తున్న వెంకీకి ఇది మంచి అవకాశం.

ఒకటి సంక్రాతి కలిసొచ్చే అంశం, రెండు వెంకీ, అనిల్ కాంబోపై ఉన్న నమ్మకంతో 'సంక్రాంతికి వ‌స్తున్నాం' గ్యారంటీ హిట్ అని ధీమాగా ఉన్నారు మేకర్స్ అండ్ ఫాన్స్. ఇప్పుడు ఈ సినిమా టైటిల్, ఫస్ట్ లుక్ పోస్టర్‌ను మేకర్స్ రిలీజ్ చేశారు. 2025 సంక్రాంత్రి కి విడుదల చేస్తామని పోస్టర్ లోనే సంక్రాంతి సందడి నింపేశారు. ట్రెడిషనల్ లుక్ లో ఒక పక్క ఐశ్వర్య రాజేష్, ఇంకో వైపు మోడరన్ లుక్ లో మీనాక్షి నిల్చోగా ఇద్దరు భామలు మధ్య లుంగీ ధరించి గన్ చేత పట్టి నిల్చున్నారు వెంకీ. పోస్టర్ తో మరింత ఆసక్తి కలిగించారు టీమ్.